წესები შეზღუდული შესაძლებლობის მქონე მგზავრებისთვის

ზოგადი ინფორმაცია

oozh.ge-ზე გამოქვეყნებული ყველა მომსახურება დამოკიდებულია მომსახურების მიმწოდებლების ხელმისაწვდომობასა და ავიაკომპანიების მიერ დადგენილ გადაზიდვის პირობებზე; მათზე ასევე ვრცელდება oozh.ge-ს წესები და პირობები.

ავიაკომპანიების პირობები შეიძლება ითვალისწინებდეს ჩასხდომის განსაკუთრებულ წესს, მგზავრის ვალდებულებებს ან სხვა შეზღუდვებს. ამ წესებს ავიაკომპანიები ადგენენ. ჩვენ გვსურს, ყველა მგზავრს მოგზაურობის თანაბარი შესაძლებლობა ჰქონდეს, ამიტომ გთავაზობთ ქვემოთ მოცემულ ინფორმაციას.

თქვენი გადაზიდვის ხელშეკრულება იმ ავიაკომპანიასთან, რომელიც საერთაშორისო, შიდა ან საერთაშორისო მარშრუტის ნაწილის რეისს ასრულებს, რეგულირდება ავიაკომპანიის პირობებით, წესებითა და გამოსაყენებელი კანონმდებლობით: საქართველოდან გამგზავრებისას — საქართველოს სამოქალაქო ავიაციის სააგენტოს წესებით, ევროკავშირიდან გამგზავრებისას — ევროკავშირის რეგულაციით (EC) №1107/2006 საჰაერო მოგზაურობისას შეზღუდული შესაძლებლობისა და შეზღუდული გადაადგილების მქონე პირების უფლებების შესახებ.

ავიაკომპანიას შეუძლია უარი თქვას მგზავრის გადაყვანაზე, თუ მგზავრი არ იცავს გამოსაყენებელ კანონმდებლობას ან დროულად არ წარადგენს სპეციალურ საჭიროებასთან დაკავშირებულ აუცილებელ დოკუმენტებსა და ინფორმაციას.

შეზღუდული გადაადგილების მქონე მგზავრები

ავიაკომპანია შეზღუდული შესაძლებლობის მქონე მგზავრს შემდეგი ფაქტორების გათვალისწინებით იღებს:

• რამდენად შეუძლია აეროპორტის მომსახურე სამსახურს საჭირო დახმარების გაწევა (აღჭურვილობა, მომზადებული პერსონალი);
• შეზღუდვები: შეზღუდული გადაადგილების მქონე მგზავრების (PRM) მაქსიმალური რაოდენობა ბორტზე საჰაერო ხომალდის თითოეული ტიპისთვის, ასევე PRM-ის გარკვეული კატეგორიების მიღების პირობები;
• მგზავრის ჯანმრთელობის მდგომარეობა, საჭირო აღჭურვილობა, ავიაკომპანია, საჰაერო ხომალდის ტიპი და მისი შეზღუდვები — მოგზაურობის კომფორტისა და უსაფრთხოების უზრუნველსაყოფად.

ამიტომ სპეციალური დახმარება მოითხოვეთ დაჯავშნისას ან გაფრენამდე არანაკლებ 72 საათით ადრე, რათა ავიაკომპანიამ საჭირო მომზადება მოასწროს. ჩვენ თქვენს მოთხოვნას ჯავშანში შევიტანთ და ავიაკომპანიას დაუყოვნებლივ გადავცემთ. ევროკავშირის წესებით ავიაკომპანია ვალდებულია დახმარება გაგიწიოთ, თუ მას გაფრენამდე არანაკლებ 48 საათით ადრე შეატყობინეს. თუ მოთხოვნას დაგვიანებით მივიღებთ, ავიაკომპანიამ შეიძლება დახმარება ვერ უზრუნველყოს ან, თავისი წესების შესაბამისად, გადაყვანაზე უარი თქვას.

გარკვეული სამედიცინო მდგომარეობის მქონე მგზავრებს ავიაკომპანიამ შეიძლება სამედიცინო ცნობა მოსთხოვოს. ასეთ შემთხვევაში ექიმი ავსებს სპეციალურ ფორმას MEDIF, რომელიც ავიაკომპანიას ეგზავნება.

ფორმა ხელმისაწვდომია ავიაკომპანიების ოფიციალურ ვებგვერდებზე; ასევე შეგვიძლია მოგაწოდოთ დაჯავშნისას. შევსებული ფორმა გაუგზავნეთ ავიაკომპანიას მის ვებგვერდზე მითითებულ ელფოსტაზე ან ჩვენი მეშვეობით.

გთხოვთ, შეგვატყობინოთ, რა დახმარება გჭირდებათ გადაადგილებისას. საერთაშორისო პრაქტიკაში ეტლით მომსახურების სამი კატეგორია გამოიყენება:

1. WCHR — ეტლი საჭიროა მხოლოდ დიდ მანძილზე გადაადგილებისთვის; მგზავრს კიბეზე ასვლა დამოუკიდებლად შეუძლია.
2. WCHS — მგზავრს კიბეზე ასვლა არ შეუძლია, მაგრამ მოკლე მანძილზე დამოუკიდებლად გადაადგილდება.
3. WCHC — მგზავრს დამოუკიდებლად გადაადგილება საერთოდ არ შეუძლია: ეტლი და დახმარება სჭირდება ბორტზე ადგილამდე, ბორტზეც დახმარების გარეშე ვერ გადაადგილდება.

თუ საკუთარი ეტლით მოგზაურობთ, მიუთითეთ მისი წონა, ზომები და სხვა მახასიათებლები (მაგალითად, დასაკეცია თუ არა, სპორტულია თუ ელექტრო).

ელექტროეტლი გადაიყვანება განსაკუთრებული პირობებით. ჰერმეტული (დაუღვრელი) აკუმულატორი შეიძლება ეტლზე დარჩეს, თუ ის მყარად არის დამაგრებული, გამორთულია და კონტაქტები იზოლირებული აქვს. თხევადელექტროლიტიანი ან ლითიუმის აკუმულატორის მქონე ეტლებს გადასაყვანად არ იღებენ.

შეზღუდული გადაადგილების მქონე მგზავრის გადაადგილების საშუალებები (ეტლი, ყავარჯნები, სხვა აღჭურვილობა) ბარგის განყოფილებაში უფასოდ გადაიყვანება.

მხედველობის ან სმენის დარღვევის მქონე მგზავრები

გთხოვთ, თქვენი საჭიროების შესახებ დაჯავშნისას შეგვატყობინოთ, რათა ეს ინფორმაცია ავიაკომპანიას გადავცეთ. ასეთ მგზავრებს სამედიცინო ცნობა არ მოეთხოვებათ.

ზოგმა ავიაკომპანიამ შეიძლება მოითხოვოს, რომ მხედველობის ან სმენის დარღვევის მქონე მგზავრი თანმხლებ პირთან ერთად მოგზაურობდეს; გთხოვთ, გაეცნოთ ავიაკომპანიის წესებს.

შეზღუდული გადაადგილების ან სენსორული დარღვევის მქონე მგზავრს შეუძლია ბორტზე ადგილის არჩევა, თუმცა უსაფრთხოების მიზნით ზოგ ადგილზე (მაგალითად, საავარიო გასასვლელებთან) მისი განთავსება შეიძლება შეიზღუდოს.

მხედველობის ან სმენის დარღვევის მქონე მგზავრს შეუძლია იმოგზაუროს მეგზური ან დამხმარე ძაღლით. ასეთი ძაღლი უფასოდ გადაიყვანება. მის შესახებ დაჯავშნისას უნდა შეგვატყობინოთ.

მეგზური და დამხმარე ძაღლების გადაყვანის პირობები:

• ძაღლის წონა და ზომა შეიძლება შეზღუდული იყოს;
• მგზავრს უნდა ჰქონდეს დამხმარე ცხოველის (Service Animal) დამადასტურებელი სერტიფიკატი;
• ძაღლი სალონში თავისუფლად არ უნდა გადაადგილდებოდეს;
• ძაღლს ცალკე ადგილი არ ეკუთვნის;
• ძაღლს უნდა ეკეთოს ალიკაპი და იყოს საბელით.

ჯანმრთელობის მონაცემები და თქვენი თანხმობა

ინფორმაცია ჯანმრთელობის მდგომარეობის ან შეზღუდული შესაძლებლობის შესახებ განსაკუთრებული კატეგორიის პერსონალური მონაცემია. მას ვამუშავებთ მხოლოდ თქვენი წერილობითი თანხმობით, რომელსაც ცალკე გასცემთ — დახმარების მოთხოვნის ფორმაში ცალკე ველის მონიშვნით ან ელფოსტით გაგზავნილი დადასტურებით.

• მონაცემებს ვიყენებთ მხოლოდ სპეციალური დახმარების ორგანიზებისთვის;
• მათ გადავცემთ თქვენი რეისის შემსრულებელ ავიაკომპანიას (ავიაკომპანიებს) და მათი მეშვეობით — აეროპორტის მომსახურე სამსახურებს;
• მონაცემებს ვინახავთ მოგზაურობის დასრულებამდე, შემდეგ კი ვშლით, თუ ისინი მოგზაურობასთან დაკავშირებული პრეტენზიისთვის საჭირო არ არის;
• თანხმობის გამოხმობა ნებისმიერ დროს შეგიძლიათ ელფოსტით [email protected]; გამოხმობის შემდეგ დახმარების მოთხოვნას ვეღარ გადავცემთ;
• არასრულწლოვნის ჯანმრთელობის მონაცემებს ვამუშავებთ მხოლოდ მშობლის ან სხვა კანონიერი წარმომადგენლის წერილობითი თანხმობით.

დაწვრილებით იხილეთ კონფიდენციალურობის პოლიტიკა.

ჩვენი პასუხისმგებლობა

დროულად მიღებულ მოთხოვნას ავიაკომპანიას სწორად და დაუყოვნებლივ გადავცემთ — ეს ჩვენი ვალდებულებაა. დახმარებას ავიაკომპანია და აეროპორტი უზრუნველყოფენ. თუ სპეციალური საჭიროების შესახებ შეტყობინება დაგვიანებით მივიღეთ ან საერთოდ არ მიგვიღია, ჩასხდომაზე უარისთვის, რომელიც ამით არის გამოწვეული, პასუხს ვერ ვაგებთ.

თუ თქვენი მარშრუტი სხვადასხვა ავიაკომპანიის რეისებს მოიცავს, გაეცანით თითოეული ავიაკომპანიის წესებს შეზღუდული შესაძლებლობის მქონე მგზავრების შესახებ.

სპეციალური დახმარების მოთხოვნისთვის დაგვირეკეთ ნომერზე +40 31 780 80 80, მოგვწერეთ ელფოსტაზე [email protected] ან ჩატში. დამატებითი ინფორმაციისთვის მიმართეთ ავიაკომპანიას.