კონფიდენციალურობის პოლიტიკა

ეს პოლიტიკა განმარტავს, როგორ ვაგროვებთ და ვამუშავებთ პერსონალურ მონაცემებს, როდესაც სარგებლობთ ვებგვერდით oozh.ge და ჩვენი მომსახურებით. ტერმინებს, რომლებიც აქ არ არის განმარტებული, აქვს წესებსა და პირობებში მოცემული მნიშვნელობა.

1. დამუშავებისთვის პასუხისმგებელი პირი

თქვენი პერსონალური მონაცემების დამუშავებისთვის პასუხისმგებელი პირია EMA PLUS SOLUTIONS SRL (იურიდიული მისამართი: Intrarea Gheorghe Simionescu №19, ოფისი B26, სექტორი 1, ბუქარესტი, რუმინეთი; სავაჭრო რეესტრის ნომერი J40/19757/2017; უნიკალური სარეგისტრაციო კოდი 38540407).

პერსონალური მონაცემების დაცვის საკითხებზე დაგვიკავშირდით ელფოსტით [email protected] ან წერილით მისამართზე: EMA PLUS SOLUTIONS SRL, Intrarea Gheorghe Simionescu №19, ოფისი B26, სექტორი 1, ბუქარესტი, რუმინეთი.

2. რომელი კანონმდებლობა გამოიყენება

EMA PLUS SOLUTIONS SRL ევროკავშირში დაფუძნებული კომპანიაა, ამიტომ მონაცემებს ვამუშავებთ ევროპის პარლამენტისა და საბჭოს 2016 წლის 27 აპრილის რეგულაციის (EU) 2016/679 (მონაცემთა დაცვის ზოგადი რეგულაცია, შემდგომში — GDPR) და რუმინეთის კანონმდებლობის შესაბამისად.

საქართველოში მყოფი მომხმარებლების მონაცემებს ასევე ვამუშავებთ „პერსონალურ მონაცემთა დაცვის შესახებ“ საქართველოს კანონის (შემდგომში — საქართველოს კანონი) შესაბამისად, იმ ფარგლებში, რომლებშიც ეს კანონი გამოიყენება. ამ კანონის 34-ე მუხლის მე-6 პუნქტის თანახმად, ევროკავშირში დაფუძნებულ კომპანიას საქართველოში სპეციალური წარმომადგენლის დანიშვნა არ ევალება.

3. რა მონაცემებს ვამუშავებთ

ა) მონაცემები, რომლებსაც თქვენ გვაწვდით

• დაჯავშნისას: მგზავრების სახელი და გვარი, დაბადების თარიღი, სქესი, მოქალაქეობა, სამგზავრო დოკუმენტის (პასპორტის ან პირადობის მოწმობის) ნომერი და მოქმედების ვადა, საკონტაქტო ელფოსტა და ტელეფონის ნომერი, ავიაკომპანიის ლოიალობის პროგრამის ნომერი, თუ მას მიუთითებთ;
• ჯავშნისა და ბილეთის მონაცემები: ჯავშნის კოდი, ბილეთის ნომერი, რეისი, თარიღები, მარშრუტი, ფასი, დამატებითი მომსახურება;
• ინვოისისთვის საჭირო მონაცემები, თუ მათ მიუთითებთ;
• ანგარიშის შექმნისას: სახელი და გვარი, სქესი, ელფოსტა, ტელეფონის ნომერი, პაროლი, იმ მგზავრების მონაცემები, რომლებთანაც ხშირად მოგზაურობთ, ძებნისა და ჯავშნების ისტორია;
• სიახლეების გამოწერისას: ელფოსტა, სახელი და გვარი, ასევე მოგზაურობასთან დაკავშირებული თქვენი ინტერესები, თუ მათ გაგვიზიარებთ;
• კომპენსაციის ან თანხის დაბრუნების მოთხოვნაში დახმარებისას: ბილეთისა და რეისის მონაცემები, ჩასხდომის ბარათის ასლი და მოთხოვნისთვის საჭირო სხვა ინფორმაცია;
• ელფოსტით, ჩატით ან ვებგვერდის ფორმებით მოწერისას: თქვენი საკონტაქტო მონაცემები და მიმოწერის შინაარსი.

ბ) გადახდის მონაცემები

ბარათის მონაცემებს Netopia-ს დაცულ საგადახდო გვერდზე შეიყვანთ. ბარათის სრულ ნომერსა და CVV კოდს ჩვენ არ ვიღებთ და არ ვინახავთ; ვიღებთ გადახდის შედეგს და გადახდის იდენტიფიკაციისთვის საჭირო მონაცემებს. თუ საბანკო გადარიცხვით იხდით, ჩვენი ბანკისგან ვიღებთ გადამხდელის სახელს, ანგარიშის ნომერს (IBAN), თანხასა და გადახდის დანიშნულებას.

გ) მონაცემები, რომლებსაც ავტომატურად ვაგროვებთ

ვებგვერდზე შესვლისას ვაგროვებთ IP მისამართს, ბრაუზერისა და მოწყობილობის მონაცემებს, ენის პარამეტრებს, მდებარეობას, საიდანაც შედიხართ, შესვლის თარიღსა და დროს, ნანახ გვერდებსა და ვებგვერდზე შესრულებულ ქმედებებს. ამისთვის ქუქი ფაილებსა და მსგავს ტექნოლოგიებს ვიყენებთ ქუქი ფაილების პოლიტიკის შესაბამისად; ფუნქციური, ანალიტიკური და მარკეტინგული ქუქი ფაილები მხოლოდ თქვენი თანხმობით გამოიყენება.

დ) სხვა პირების მონაცემები

თუ დაჯავშნისას სხვა მგზავრების მონაცემებს გვაწვდით, დარწმუნდით, რომ მათ ამის შესახებ იციან და ამ პოლიტიკას გაეცნენ.

ე) ჯანმრთელობის მონაცემები

სპეციალური დახმარების მოთხოვნისას შეიძლება მოგვაწოდოთ ინფორმაცია ჯანმრთელობის მდგომარეობის ან შეზღუდული შესაძლებლობის შესახებ. ეს განსაკუთრებული კატეგორიის მონაცემებია: მათ ვამუშავებთ მხოლოდ თქვენი წერილობითი თანხმობით და მხოლოდ დახმარების ორგანიზებისთვის (იხ. „წესები შეზღუდული შესაძლებლობის მქონე მგზავრებისთვის“).

4. დამუშავების მიზნები და სამართლებრივი საფუძვლები

მიზანი	სამართლებრივი საფუძველი
ჯავშნის გაფორმება, ბილეთის გამოცემა, დამატებითი მომსახურება, ჯავშანთან დაკავშირებული შეტყობინებები (მათ შორის რეისის ცვლილების შესახებ)	ხელშეკრულების დადება და შესრულება — GDPR, მუხ. 6(1)(b); საქართველოს კანონი, მუხ. 5(1)(ბ)
გადახდის მიღება და თანხის დაბრუნება	ხელშეკრულების შესრულება — GDPR, მუხ. 6(1)(b); საქართველოს კანონი, მუხ. 5(1)(ბ)
ანგარიშის შექმნა და მართვა	თქვენი მოთხოვნა და ხელშეკრულება — GDPR, მუხ. 6(1)(b); საქართველოს კანონი, მუხ. 5(1)(ბ) და (კ)
მხარდაჭერა, პრეტენზიები და ხელშეკრულებაზე უარის თქმის განცხადებები	ხელშეკრულების შესრულება და კანონისმიერი ვალდებულება — GDPR, მუხ. 6(1)(b) და (c); საქართველოს კანონი, მუხ. 5(1)(ბ) და (გ)
ბარათით თაღლითობის პრევენცია და ვებგვერდის უსაფრთხოება	კანონიერი ინტერესი — GDPR, მუხ. 6(1)(f); საქართველოს კანონი, მუხ. 5(1)(ი)
ბუღალტრული აღრიცხვა, ინვოისები, საგადასახადო ვალდებულებები, უფლებამოსილი ორგანოების მოთხოვნებზე პასუხი	კანონისმიერი ვალდებულება — GDPR, მუხ. 6(1)(c); საქართველოს კანონი, მუხ. 5(1)(გ) და (დ)
სიახლეები და სარეკლამო შეთავაზებები	თანხმობა — GDPR, მუხ. 6(1)(a); საქართველოს კანონი, მუხ. 5(1)(ა) და მუხ. 12
ფუნქციური, ანალიტიკური და მარკეტინგული ქუქი ფაილები (ბოლო ძიებები, მხარდაჭერის ჩატი, ვებგვერდის გამოყენების სტატისტიკა, პერსონალიზებული რეკლამა)	თანხმობა — GDPR, მუხ. 6(1)(a); საქართველოს კანონი, მუხ. 5(1)(ა)
სპეციალური დახმარების ორგანიზება (ჯანმრთელობის მონაცემები)	წერილობითი თანხმობა — GDPR, მუხ. 9(2)(a); საქართველოს კანონი, მუხ. 6(1)(ა)
სამართლებრივი მოთხოვნების წარდგენა და დაცვა, დავების განხილვა	კანონიერი ინტერესი — GDPR, მუხ. 6(1)(f); საქართველოს კანონი, მუხ. 5(1)(ი)

ბილეთის გამოსაცემად საჭირო მონაცემების მოწოდება აუცილებელია: მათ გარეშე ავიაკომპანია ბილეთს ვერ გამოსცემს. თანხმობაზე დაფუძნებული მონაცემების მოწოდება ნებაყოფლობითია და უარი ბილეთის შეძენაზე გავლენას არ ახდენს.

5. პირდაპირი მარკეტინგი

სიახლეებსა და სარეკლამო შეთავაზებებს ელფოსტით ან სხვა ელექტრონული საშუალებით გიგზავნით მხოლოდ თქვენი თანხმობით, რომელსაც ცალკე, წინასწარ მოუნიშნავი ველის მონიშვნით გამოხატავთ. თანხმობა ბილეთის შეძენის პირობა არ არის.

თანხმობის გამოხმობა შეგიძლიათ ნებისმიერ დროს, უფასოდ და ისეთივე მარტივად, როგორც გაეცით: ყოველ სარეკლამო წერილში არსებული გამოწერის გაუქმების ბმულით ან ელფოსტით [email protected]. პირდაპირი მარკეტინგის მიზნით მონაცემების დამუშავებას შევწყვეტთ არაუგვიანეს 7 სამუშაო დღისა თქვენი მოთხოვნის მიღებიდან. თანხმობის გაცემისა და გამოხმობის ფაქტსა და თარიღს ვინახავთ პირდაპირი მარკეტინგის მთელი პერიოდის განმავლობაში და მისი დასრულებიდან 1 წლის განმავლობაში.

6. მონაცემების მიმღებები

• ავიაკომპანიები და სხვა გადამზიდავები, დაჯავშნის საერთაშორისო სისტემები და აეროპორტის მომსახურების ორგანიზაციები — ბილეთის გამოსაცემად და ფრენის შესასრულებლად; ისინი თქვენს მონაცემებს საკუთარი პასუხისმგებლობით ამუშავებენ;
• Netopia (რუმინეთი) — ბარათით გადახდის დასამუშავებლად;
• ბანკი, რომელშიც ჩვენი ანგარიშია გახსნილი — საბანკო გადარიცხვების მისაღებად და თანხის დასაბრუნებლად;
• დამუშავებაზე უფლებამოსილი პირები, რომლებიც ჩვენი დავალებითა და ჩვენთან დადებული ხელშეკრულების საფუძველზე მოქმედებენ: ჰოსტინგის, IT მომსახურების, ელფოსტის გაგზავნის, ჩატის, ანალიტიკისა და რეკლამის სერვისების მიმწოდებლები;
• სახელმწიფო ორგანოები, სასამართლო და სამართალდამცავი ორგანოები — კანონით გათვალისწინებულ შემთხვევებში;
• ბანკები, აუდიტორები და იურიდიული მრჩევლები — საჭიროების შემთხვევაში.

7. მონაცემების საერთაშორისო გადაცემა

თქვენს მონაცემებს ევროკავშირში (რუმინეთში) ვამუშავებთ და ვიყენებთ ევროკავშირში მოქმედ დამუშავებაზე უფლებამოსილ პირებს. საქართველოდან ევროკავშირში მონაცემების გადაცემისას ვიცავთ საქართველოს კანონის 37-ე მუხლის მოთხოვნებს; ევროკავშირში მონაცემებს GDPR იცავს.

ავიაკომპანიები, დაჯავშნის სისტემები და ზოგი მომწოდებელი შეიძლება ევროკავშირისა და საქართველოს ფარგლებს გარეთ იყოს დაფუძნებული. ასეთ ქვეყნებში მონაცემებს გადავცემთ მხოლოდ მაშინ, როდესაც ეს აუცილებელია თქვენ მიერ მოთხოვნილი ხელშეკრულების შესასრულებლად (მაგალითად, თუ ბილეთს ევროკავშირის გარეთ დაფუძნებული ავიაკომპანია გამოსცემს), ან თუ დაცვის სათანადო გარანტიები არსებობს — ევროკომისიის გადაწყვეტილება დაცვის ადეკვატური დონის შესახებ ან სტანდარტული სახელშეკრულებო დებულებები — და დაცულია გამოსაყენებელი კანონმდებლობის მოთხოვნები.

8. შენახვის ვადები

• ჯავშნისა და გადახდის მონაცემები — ხელშეკრულების მოქმედების განმავლობაში, შემდეგ კი ბუღალტრული აღრიცხვისა და საგადასახადო კანონმდებლობით დადგენილი ვადით და სამართლებრივი მოთხოვნების ხანდაზმულობის ვადის გასვლამდე;
• ანგარიშის მონაცემები — ანგარიშის წაშლამდე; წაშლის შემდეგ ვინახავთ მხოლოდ იმ მონაცემებს, რომელთა შენახვაც კანონით გვევალება;
• პირდაპირი მარკეტინგისთვის გამოყენებული მონაცემები — თანხმობის გამოხმობამდე; თანხმობისა და მისი გამოხმობის ჩანაწერი — მარკეტინგის დასრულებიდან 1 წლის განმავლობაში;
• ჯანმრთელობის მონაცემები — მოგზაურობის დასრულებამდე; შემდეგ ვშლით, თუ ისინი მოგზაურობასთან დაკავშირებული პრეტენზიისთვის საჭირო არ არის;
• მიმოწერა მხარდაჭერასთან — იმ ვადით, რომელიც მოთხოვნის განხილვისა და შესაძლო პრეტენზიებისთვის არის საჭირო;
• ქუქი ფაილებით შეგროვებული მონაცემები — ქუქი ფაილების პოლიტიკაში მითითებული ვადებით.

ვადის გასვლის შემდეგ მონაცემებს ვშლით, ვანადგურებთ ან ისე ვაანონიმურებთ, რომ თქვენი იდენტიფიცირება შეუძლებელი გახდეს.

9. თქვენი უფლებები

თქვენ უფლება გაქვთ:

• მიიღოთ ინფორმაცია თქვენი მონაცემების დამუშავების შესახებ;
• გაეცნოთ თქვენს მონაცემებს და მიიღოთ მათი ასლი;
• მოითხოვოთ მონაცემების გასწორება, განახლება და შევსება;
• მოითხოვოთ მონაცემების დამუშავების შეწყვეტა, წაშლა ან განადგურება;
• მოითხოვოთ მონაცემების დაბლოკვა (დამუშავების შეზღუდვა);
• მოითხოვოთ მონაცემების გადატანა თქვენთვის ან სხვა დამუშავებისთვის პასუხისმგებელი პირისთვის;
• გააპროტესტოთ კანონიერ ინტერესზე დაფუძნებული დამუშავება და ნებისმიერ დროს უარი თქვათ პირდაპირ მარკეტინგზე;
• არ დაექვემდებაროთ მხოლოდ ავტომატიზებულ დამუშავებაზე დაფუძნებულ გადაწყვეტილებას, რომელიც თქვენთვის სამართლებრივ ან სხვა მნიშვნელოვან შედეგს წარმოშობს;
• ნებისმიერ დროს გამოიხმოთ თანხმობა; გამოხმობა გავლენას არ ახდენს მანამდე განხორციელებული დამუშავების კანონიერებაზე;
• გაასაჩივროთ მონაცემების დამუშავება საზედამხედველო ორგანოში ან სასამართლოში.

მოთხოვნა გამოგვიგზავნეთ ელფოსტაზე [email protected]. შეიძლება გთხოვოთ ინფორმაცია, რომელიც თქვენი ვინაობის დასადასტურებლადაა საჭირო. პასუხს გაგცემთ უსასყიდლოდ, არაუგვიანეს 10 სამუშაო დღისა; განსაკუთრებულ შემთხვევაში ეს ვადა შეიძლება კიდევ 10 სამუშაო დღით გავაგრძელოთ, რის შესახებაც გაცნობებთ.

საჩივრის წარდგენა შეგიძლიათ:

• საქართველოში — სახელმწიფო აუდიტის სამსახურში, რომელიც პერსონალურ მონაცემთა დაცვაზე ზედამხედველობას ახორციელებს;
• რუმინეთში — პერსონალურ მონაცემთა დამუშავების ზედამხედველობის ეროვნულ ორგანოში (ANSPDCP, www.dataprotection.ro);
• ევროკავშირის იმ ქვეყნის საზედამხედველო ორგანოში, სადაც ცხოვრობთ ან მუშაობთ.

10. არასრულწლოვნები

ბავშვების მონაცემებს, რომლებსაც მშობელი ან სხვა კანონიერი წარმომადგენელი ჯავშანში უთითებს, ხელშეკრულების შესასრულებლად ვამუშავებთ. 16 წლამდე პირის მონაცემების თანხმობაზე დაფუძნებული დამუშავება (მაგალითად, სიახლეების გამოწერა) დასაშვებია მხოლოდ მშობლის ან სხვა კანონიერი წარმომადგენლის თანხმობით. არასრულწლოვნის ჯანმრთელობის მონაცემებს ვამუშავებთ მხოლოდ მშობლის ან სხვა კანონიერი წარმომადგენლის წერილობითი თანხმობით.

11. მონაცემების უსაფრთხოება

მონაცემების დასაცავად ვიყენებთ ტექნიკურ და ორგანიზაციულ ზომებს, მათ შორის დაშიფრულ კავშირს (HTTPS), წვდომის შეზღუდვას და თანამშრომლების კონფიდენციალურობის ვალდებულებას. ბარათით გადახდას Netopia ამუშავებს, ბარათის მფლობელის ავთენტიფიკაციით (3-D Secure). ინტერნეტით მონაცემების გადაცემის სრული დაცულობის გარანტია შეუძლებელია, თუმცა ვიღებთ ყველა გონივრულ ზომას უნებართვო წვდომის, დაკარგვისა და გამჟღავნების თავიდან ასაცილებლად.

12. ქუქი ფაილები

ქუქი ფაილების გამოყენება, მათი სახეები და თანხმობის მართვის წესი აღწერილია ქუქი ფაილების პოლიტიკაში.

13. პოლიტიკის ცვლილება

ამ პოლიტიკის განახლებისას ახალ ვერსიას oozh.ge-ზე გამოვაქვეყნებთ. არსებითი ცვლილების შესახებ წინასწარ გაცნობებთ ელფოსტით ან ვებგვერდზე. თუ ცვლილება ახალ თანხმობას საჭიროებს, მას ცალკე გთხოვთ.